Áfengisgjöld hafa hækkað um og yfir 100% frá hruni, sé boðuð hækkun um áramótin tekin með í reikninginn. Á sama tíma er útlit fyrir að hækkun vísitölu neysluverðs sé um 39%.

Þetta kemur fram í tilkynningu frá Félagi atvinnurekenda. Er þar bent á að áfengisgjöld hafi því hækkað gríðarlega umfram almennt verðlag í landinu.

Mynd/FA

FA bendir á að í september 2008 hafi áfengisgjald á sentilítra hreins vínanda í léttvíni verið 52,8 krónur. Samkvæmt fjárlagafrumvarpi fyrir árið 2017 verður það 106,8 krónur og hefur þá hækkað um 102%. Áfengisgjaldið fyrir sterkt vín var 70,8 krónur fyrir hrun en verður um áramót 144,5 krónur, nái tillaga ríkisstjórnarinnar fram að ganga. Það er 104% hækkun. Áfengisgjaldið á hvern sentilítra vínanda í bjór var haustið 2008 58,7 krónur en gæti um áramót orðið 117,3 krónur eða 100% hærra.

„Jafnvel þótt dregin sé frá rúmlega 20% hækkun áfengisgjalds í ársbyrjun 2016, sem var gerð til að mæta lækkun virðisaukaskatts úr 24,5% í 11%, liggur fyrir að áfengisgjaldið hefur verið hækkað um 40% umfram almennar verðlagshækkanir í landinu eftir hrun,“ segir í tilkynningu FA.

„Þetta skýtur skökku við, því að skömmu fyrir hrun var þverpólitísk samstaða um að skattlagning á áfengi væri orðin of há og talsmenn allra helstu flokka voru sammála um að draga þyrfti úr henni.“ Þá er vitnað í ummæli tveggja núverandi þingmanna sem birtust Blaðinu 20. júlí 2007.

Katrín Jakobsdóttir, núverandi formaður Vinstri grænna, sagði þar: „Ég held að neyslu­stýr­ing­in sé ekki að virka, og held að gjöld á áfengi hafi ekki áhrif á það hvernig vín­menn­ing þró­ast.”

Þorgerður Katrín Gunnarsdóttir, nú þingmaður Viðreisnar, sagði: „Íslend­ing­ar eru full­fær­ir um að taka ákv­arðanir um áfeng­isneyslu sjálf­ir, án þess að stjórn­völd stýri neyslu með háum áfeng­is­gjöldum.“

„Fróðlegt verður að sjá hvernig þessir þingmenn og aðrir greiða atkvæði um þá tillögu að hækka enn áfengisgjöldin,“ segir í tilkynningunni.

Tengdar fréttir

Fjárlagafrumvarp 2017

Mikilvægt að vita hvaða valdi sé afsalað

• Fjárlögin mjög þensluhvetjandi
• Ný ríkisstjórn snúi við blaðinu
• Erfitt ár í vændum hjá háskólanum
• Miðjuþrepið fellt niður

» Fleiri tengdar fréttir

• Blogga um frétt