Hlutabréf í álframleiðandanum Century Aluminum Co, sem á m.a. Norðurál, hækkaði um 15,6% í gær. Hækkunin er tengd við kvörtun bandarískra yfirvalda þar sem Kínverjar eru sakaðir um að stækka álframleiðslu sína í gegnum ódýr lán frá ríkisbönkum og niðurgreiðslur. Niðurgreiðslurnar hafa gert Kínverjum kleift að koma á markað ódýru áli og tekið markaðshlutdeild frá öðrum löndum.
Kvörtunin er talin koma sér vel fyrir álbransann í Bandaríkjunum í heild sinni.
Ef að kvartanir bandarískra stjórnvalda bera árangur gæti það leitt til tollasetningar sem gæti gert kínverskt ál dýrara í Bandaríkjunum og það myndi hjálpa framleiðendum eins og Century Aluminum.
Í frétt The Motley Fool kemur fram að hækkunin á hlutabréfunum komi Century eflaust vel en á síðsata ári tapaði fyrirtækið 127 milljónum Bandaríkjadala eða 14,5 milljörðum íslenskra króna og að ekkert bendi til þess að það hægi á tapinu á þessu ári nema að álverð hækki töluvert.
Á vef Norðuráls kemur fram að Century Aluminum sé með höfuðstöðvar í Chicago í Illinois í Bandaríkjunum og eigi fjögur önnur álver í Bandaríkjunum. Century Aluminum festi kaup á Norðuráli í apríl 2004 en áður var fyrirtækið dótturfyrirtæki Columbia Ventures Corporation (CVC).