Kröfur upp á 7,3 milljarða hjá Öskum Capital

Rúmir 3 milljarðar voru greiddir upp í 7,3 milljarða kröfur í gjaldþroti Aska Capital hf. Búið var tekið til gjaldþrotaskipta 25. september 2015 og lauk skiptum á búinu 30. desember 2016. Greint er frá þessu í Lögbirtingablaðinu í dag. Forgangskröfur upp á 77 milljónir voru greiddar að fullu en samþykktar almennar kröfur voru kr. 7.364.369.959 og var greitt upp í þær kr. 3.010.151.861 eða 40,87 hundraðshlutar.

Askar Capital var fjárfestingabanki sem lagði áherslu á sérhæfðar fjárfestingar á nýmörkuðum.Hann hóf starfsemi sína í byrjun árs 2007 en í júlí 2010 óskaði hann eftir slitameðferð á félaginu  hjá dómsstólum.

Fyrri frétt mbl.is: Askar óska eftir slitameðferð

Höfuðstöðvar bankans voru við Suðurlandsbraut í Reykjavík en aðrar skrifstofur bankans og dótturfélaga hans voru á Indlandi, Lúxemborg, Rúmeníu og Bandaríkjunum. Forstjóri bankans til ársins 2008 var Tryggvi Þór Herbertsson.

• Blogga um frétt