Áfrýjunarnefnd neytendamála hefur fellt úr gildi ákvörðun Neytendastofu sem sneri að markaðssetningu og viðskiptaháttum Verkfæralagersins á Smáratorgi í Kópavogi. Með ákvörðuninni komst Neytendastofa að þeirri niðurstöðu að auglýsingar Verkfæralagersins væru villandi þar sem birtar væru myndir af vörum undir yfirskriftinni „verð frá“ sem væri ekki verð hinna myndbirtu vara.
Í úrskurði áfrýjunarnefndar í málinu kemur fram að nefndin telji að hinn almenni neytandi skilji orðin „verð frá“ sem svo að það verð sem komi fram sé lægsta mögulega verðið í tilteknum vöruflokki.
„Þar sem litlar myndir fylgi auglýsingunni af ýmsum vörutegundum sé auglýsingin ekki villandi eins og standi á í þessu máli,“ segir á vef Neytendastofu.
Úrskurðinn má lesa í heild sinni hér.
Í fyrri frétt mbl.is um málið kemur fram að Neytendastofa hafi beðið Verkfæralagerinn um að sanna að vörurnar hefðu verið seldar á auglýstu verði og að þær hefðu verið fáanlegar á „verð frá“-verðinu.
Fyrri frétt mbl.is: Markaðssetningin villandi
„Að mati Neytendastofu gat Verkfæralagerinn ekki sýnt fram á að markaðssetningin hefði verið lögleg. Taldi Neytendastofa að markaðssetningin væri villandi og bannaði Verkfæralagernum að viðhafa slíka viðskiptahætti,“ segir í fyrri fréttinni.