40 milljarða afgangur á næsta ári

Benedikt Jóhannesson, fjármála- og efnahagsráðherra.
Benedikt Jóhannesson, fjármála- og efnahagsráðherra. mbl.is/Golli

Ríkið mun skila nálægt 40 milljarða afgangi á árinu 2018 ef áætlanir ganga eftir. Þá munu skuldir ríkisins nema 10-15% af vergri landsframleiðslu í lok kjörtímabilsins að því gefnu að helmingur hluta í bönkunum verði seldur. Eru þá skuldir vegna lífeyrisskuldbindinga ekki taldar með.  

Þetta kemur fram í grein Benedikts Jóhannessonar, fjármála- og efnahagsráðherra, í Vísbendingu, vikuriti um viðskipti og efnahagsmál, sem Benedikt ritstýrði frá árinu 2006 til 2016.

Í greininni fer Benedikt yfir fjármálastefnu ríkisstjórnarinnar fyrir árið 2017 til 2022 sem hann lagði fram á fyrsta degi þinghalds eftir að ný ríkisstjórn var mynduð. Segir Benedikt næstu fimm ár fela í sér mikilvæga stefnubreytingu og nefnir sem dæmi að í stað afgangs upp á 1% af vergri landsframleiðslu eins og ákveðið var í tíð fyrri ríkisstjórnar verði afgangurinn næstu tvö ár, þ.e. 2018 og 2019, settur í 1,6% en fari svo lækkandi um 0,1% á ári til ársins 2022.

Þá verða skuldir hins opinbera lækkaðar áfram, úr 44,5% í 26% í lok tímabilsins.

Eins og fyrr segir verður afgangur af rekstri ríkisins 1,5% af VLF, eða nálægt 40 milljörðum króna. Þá er gert ráð fyrir því að afgangur á rekstri ríkisins verði tæplega 25 milljarðar fyrir árið 2017.

Þá bendir Benedikt á að verði helmingur hluta í bönkunum seldur á tímabilinu sé líklegt að skuldir ríkisins nemi í lok þess 10-15% af VLF í stað 21% eins og stefnan segir til um. Sú sala er þó ekki tímasett í stefnunni. „Mikilvægt er að aðstæður til sölu verði góðar og góð sátt um hana,“ skrifar Benedikt. 

mbl.is
Svæði

Gagnaveitur

Erlendar viðskiptafréttir