750 þúsund nýttu sér innanlandsflug

Nærri 750 þúsund farþegar nýttu sér innanlandsflug um íslenska áætlunarflugvelli í fyrra og hefur þeim fjölgað árlega frá 2012. Sem fyrr fara langflestir farþeganna um Reykjavíkurflugvöll eða liðlega helmingur samkvæmt tölum á heimasíðu Isavia, rekstraraðila flugvallanna.

Greint er frá þessu á vef Túrista.is.

Þar kemur fram að ef litið er til þróunarinnar frá aldarmótum kemur í ljós að árið í fyrra var það tíunda besta í innanlandsfluginu út frá fjölda farþega. Á sama tímabili hefur farþegafjöldinn á Keflavíkurflugvelli nærri fimmfaldast og fóru um 6,8 milljónir um Flugstöð Leifs Eiríkssonar á síðasta ári. Farþegar í millilandaflugi voru s.s. sex milljónum fleiri en í innanlandsfluginu í fyrra en til samanburðar var munurinn á þessu tvennu 565 þúsund farþegar árið 2000.

Bent er á að á meðan allar þoturnar sem taka á loft frá Keflavíkurflugvelli taka stefnuna á útlönd þá er innanlandsflug stór hluti af starfsemi alþjóðaflugvallanna í löndunum í kringum okkur. Þannig geta farþegar flogið beint út á land í tengslum við millilandaflug.

„Þetta hefur ekki verið hægt hér á landi nema stöku sinnum yfir sumartímann og þessi skortur á tengingu kann að skýra afhverju farþegum í innanlandsflugi hefur fækkað frá því að ferðamannastraumurinn hingað tók kipp árið 2011,“ segir í frétt Túrista.

Það eru hins vegar breytingar framundan því að eftir viku mun Flugfélag Ísland hefja reglulegt flug milli Akureyrar og Keflavíkurflugvallar og þá opnast möguleiki á því fyrir erlenda ferðamenn að fljúga beint norður í land við komuna til landsins. En líkt og Túristi greindi frá þá telja forsvarsmenn ferðamála á hinum Norðurlöndunum að tenging innanlandsflugs og millilandaflugs sé mikilvæg fyrir þeirra markaði.

• Blogga um frétt