Leiðandi hagvísir Analytica (e. Composite Leading Indicator) lækkaði um 0,1% í janúar. Þá voru gildi fyrir þrjá síðustu mánuði endurskoðuð niðurávið. Hagvísirinn bendir þó áfram til hagvaxtar yfir langtímaleitni. Þetta kemur fram í fréttatilkynningu.

„Þrír af sex undirliðum lækka frá í desember en mest áhrif til lækkunar hefur samdráttur aflaverðmætis vegna sjómannaverkfalls. Í öllum tilvikum er leiðrétt fyrir áhrifum árstíðasveiflu og langtímaleitni. Þrátt fyrir lækkun nú þá virðist langtímauppleitni mikilvægra undirþátta enn sterk og mikill vöxtur er í komum ferðamanna.  Áfram eru áhættuþættir í ytra umhverfi sem ógnað gætu hagvexti einkum tengdir stöðunni í alþjóðastjórnmálum.

Hagvísirinn er vísitala sem gefur vísbendingu um efnahagsumsvif að sex mánuðum liðnum. Það er hlutverk vísitölunnar að veita skýra sýn á efnahagshorfur og vara tímanlega við viðsnúningi í efnahagsumsvifum. Vísitalan er reiknuð á grundvelli sömu aðferðafræði og annars staðar þar sem sambærilegar vísitölur eru reiknaðar en sérstaklega er tekið mið af verklagi OECD.

Leiðandi hagvísir Analytica er samansettur úr sex undirþáttum af mismunandi toga. Um er að ræða aflamagn, debetkortaveltu, ferðamannafjölda, heimsvísitölu hlutabréfa, innflutning og væntingavísitölu Gallup. Í janúar hækka þrír af sex undirþáttum frá fyrra ári. Frá í desember hækka einnig þrír af sex undirþáttum.

Hugmyndin að baki vísitölunni er sú að framleiðsla hefur aðdraganda. Vísitalan er reiknuð á grundvelli þátta sem mælast í upphafi framleiðsluferilsins og/eða veita vísbendingar um eftirspurn eftir vörum og þjónustu. Til að unnt sé að auka framleiðslu þarf t.d. að afla aðfanga og stofna til fjárfestinga,“ segir í tilkynningu.

Tengdar fréttir

Kjaramál sjómanna

SVG og VM samþykktu samninginn

• Segir samninganefnd vélstjóra sniðgengna
• Felur í sér styttri vinnuviku og aukið mótframlag
• Vélstjórar undirrituðu samning við SFS
• „Ekki kjörstaða að vera í“

» Fleiri tengdar fréttir

• Blogga um frétt