Algjört frost ríkir í viðræðum milli stærstu lífeyrissjóða landsins og Kaupskila, eignarhaldsfélagsins sem heldur utan um 87% hlut Kaupþings í Arion banka, varðandi möguleg kaup sjóðanna á umtalsverðum hlut í bankanum.
Stafar það meðal annars af þeirri ástæðu að forsvarsmenn sjóðanna hafa ekki fengið að sjá áreiðanleikakönnun sem gerð hefur verið á rekstri og efnahag bankans. Þá hafa sjóðirnir ekki enn fengið í hendurnar verðmat sem ráðgjöfum á þeirra vegum var uppálagt að vinna. Af óútskýrðum ástæðum hefur vinna við það tafist um margar vikur.
Í umfjöllun um mál þetta í ViðskiptaMogganum í dag segir, að samkvæmt heimildum blaðsins er helst beðið eftir því hvort Lífeyrissjóður verslunarmanna ákveði að fjárfesta í bankanum eða ekki.