Viðskipti | mbl | 19.3.2017 | 20:26

Stærstu kaup erlendra aðila í sögu Íslands

Í skoðun er að láta félagið á markað. mbl.is/Eggert

Kaup erlendra sjóða og fjárfestingarbankans Goldman Sachs á tæplega 30% hlut í Arion banka, fyrir ríflega 48,8 milljarða króna, eru stærstu einstöku hlutabréfakaup erlendra aðila í sögu Íslands.

Þetta segir Paul Copley, forstjóri Kaupþings, í fréttatilkynningu til Kauphallar Íslands.

„Við fögnum þessum áfanga á sölu á nærri 30% í Arion banka sem lækkar hlut Kaupþings í bankanum í 57,9% sem er liður í áframhaldandi viðleitni okkar að innleysa eignasafn okkar og greiða fjármuni til hluthafa Kaupþings,“ er haft eftir Copley í tilkynningunni.

„Með þessum viðskiptum, sem eru stærstu einstöku hlutabréfakaup erlendra aðila í sögu Íslands, strax í kjölfar afléttingar fjármagnshaftanna, höfum við tryggt aðkomu alþjóðlegra fjárfesta að Arion banka sem hafa millilanga til langa sýn á fjárfestingu sína.

Allir eru þeir fjárfestar í Kaupþingi og hafa ákveðið að endurfjárfesta á Íslandi í stað þess að fara með fé sitt úr landi, sem er sterkt merki um trú þeirra á Íslandi og þá ekki síður á Arion banka.“

Þátttaka Goldman Sachs segi sína sögu

Copley segir sjóðina Taconic Capital og Och-Ziff vera stærstu hluthafa Kaupþings. Þeir hafi í mörg ár tengst Íslandi með fjölbreyttum fjárfestingum.

„Á sama hátt er Attestor Capital stór hluthafi okkar og hefur á liðnum árum fjárfest í mörgum fjármálastofnunum í Evrópu og á meðal annars ráðandi hlut í lánastofnun í Austurríki. Þátttaka þekkts fyrirtækis á borð Goldman Sachs segir sína sögu.

Ég hlakka til að vinna með þessum félögum þegar við höldum áfram að selja hlut okkar í Arion banka, líklega í gegnum almennt hlutafjárútboð þar sem við vonumst til að geta boðið einstaklingum og félögum innanlands færi á að fjárfesta í bankanum.“

Í skoðun að skrá félagið á markað

Höskuldur H. Ólafsson, bankastjóri Arion banka, segir yfirstjórn bankans lengi hafa verið þeirrar skoðunar að jákvætt væri að fá inn í hluthafahópinn erlenda aðila.

„Við höfum á undanförnum árum hitt mikinn fjölda erlendra fjárfesta og skynjað áhuga þeirra á Íslandi og bankanum. Við verðum líka vör við þennan áhuga á fleiri sviðum hér á landi eins og í ferðaþjónustu og smásölu þar sem sterk alþjóðleg vörumerki sýna landinu áður óþekktan áhuga,“ er haft eftir Höskuldi.

„Það kemur okkur því ekki á óvart að þessir fjárfestar, sem hafa komið að bankanum með óbeinum hætti í nokkur ár, kjósi nú að gerast hluthafar í Arion banka með beinum hætti. Þeir þekkja bankann vel, hafa fylgst með okkar árangri og þeirri jákvæðu þróun sem hefur átt sér stað í íslensku efnahagslífi. Þeir sýna það nú að þeir trúa því að framtíð bankans sé björt.

Að nýir aðilar, alþjóðlegir fjárfestar, komi inn í hluthafahópinn markar upphaf nýrra tíma. Í skoðun er að skrá félagið á markað og gangi það eftir mun eignarhald dreifast enn frekar.“