Airbnb hefur tekið upp nýtt nafn fyrir útrás fyrirtækisins í Kína. Fjárfestingar í Kína hafa verið tvöfaldaðar og starfsmannafjöldi þrefaldaður á svæðinu til þess að þjónusta stærsta ferðamannamarkað heims.
Heiti fyrirtækisins í Kína verður „Aibiying“ en lausleg þýðing þess er „hlýjar móttökur.“
Airbnb stefnir að tvöföldun skráðra íbúða í Kína en í fyrra voru þær áttatíu þúsund talsins. Frá og með deginum í dag verður einnig hægt að bóka leiðsögutúr um Shanghai, borð á veitingastöðum og miða á tónleika í borginni í gegnum síðuna.
Airbnb er í dag metið á um þrjátíu milljarða Bandaríkjadala og hyggur á mikinn vöxt í Asíu. Fyrirtækið hefur þegar náð mikilli útbreiðslu á vissum svæðum í heimsálfunni, líkt og í Japan, en Kína hefur reynst erfiðari markaður þar sem innlendir keppinautar eru ráðandi.
Frétt Bloomberg.