Sameining innheimtufyrirtækjanna Inkasso og Myntu mun vera á lokametrunum, samkvæmt heimildum Morgunblaðsins. Stefnt er að því að sameinað fyrirtæki starfi undir nafni Inkasso og verður það næststærsta innheimtufyrirtæki landsins á eftir Momentum.
Samkvæmt heimildum Morgunblaðsins hafa viðræður forsvarsmanna fyrirtækjanna ekki staðið lengi yfir og er markmiðið með sameiningunni ekki síst að auka möguleika á að sækja inn á erlendra markaði.
Georg G. Andersen er stærsti eigandi og forstjóri Inkasso og mun hann stýra sameinuðu félagi. Eigandi Myntu er Þórir Örn Árnason, lögfræðingur og fyrrverandi forstöðumaður lögfræðiinnheimtu Íslandsbanka.