Ný spá greiningardeildar Arion banka gerir ráð fyrir að það hægi talsvert á verðhækkunum á húsnæðismarkaði þegar líður á árið.
Aðstæður til verðhækkana eru þó enn til staðar þar sem söluframboð er lítið og útlit fyrir talsverðan innflutning vinnuafls á næstu árum. Á móti þessu vegur að nú stefnir í meiri íbúðafjárfestingu en áður og að fjölgun íbúða muni bráðlega fylgja fólksfjölgun, sem hefur ekki verið raunin upp á síðkastið. Gangi spár og væntingar greiningardeildarinnar eftir mun líklega byrja að draga úr húsnæðisskorti á næsta ári en þangað til verður markaðurinn áfram erfiður fyrir kaupendur.
Greiningardeild Arion telur að um 8.000 íbúðir verði byggðar á landinu öllu til ársloka 2019 samkvæmt uppfærðri spá um íbúðafjárfestingu. Eru það talsvert fleiri íbúðir en gert var ráð fyrir í janúar.
Það sem styður fyrst og fremst við framboðsaukninguna er hækkandi húsnæðisverð en það eykur hvatann til nýbyggingar. Þá jókst íbúðafjárfesting talsvert meira í fyrra en greiningardeildin gerði upphaflega ráð fyrir sem bendir til þess að aukinn kraftur sé að færast í uppbyggingu íbúða. Að sama skapi spá Samtök iðnaðarins að íbúðum á höfuðborgarsvæðinu muni fjölga mun hraðar á næstu árum.
Samkvæmt Arion mun þó húsnæðisskorturinn líklega aukast enn meira í ár þar sem talið er að mesta íbúafjölgunin verði á þessu ári sökum innflutnings á vinnuafli. Það þýðir að húsnæðisskorturinn mun aukast enn meira í ár en fara svo dvínandi.
Þá telur Arion ekki útilokað að íbúðafjárfesting verði meiri en samkvæmt spánni. Sem rök fyrir því megi til dæmis nefna að verið sé að setja á fót aðgerðahóp fjögurra ráðherra sem á að greiða fyrir byggingu lítilla íbúða.
„Þó að staða margra á húsnæðismarkaði verði að líkindum áfram þröng næstu mánuði og verð muni líklega hækka áfram má sjá glitta í ljós við enda ganganna þar sem framboð íbúða virðist loksins ætla að halda í við eftirspurn.“