Stjórn Icelandic Group hefur ákveðið að hefja söluferli á dótturfélagi sínu Seachill í Bretlandi.
Seachill er leiðandi framleiðandi kældra fiskafurða inn á breska smásölumarkaðinn. Samkvæmt fréttatilkynningu hefur félagið skapað sér sterka stöðu á markaðnum þar sem það býður upp á heildarlausnir fyrir viðskiptavini sinna.
Seachill hefur verið í vexti frá stofnun þess árið 1998 og er nú einn stærsti framleiðandi kældra fiskafurða í Bretlandi. Félagið er með aðsetur í Grimsby þar sem það starfrækir verksmiðju sem hefur verið endurnýjuð að miklu leyti síðustu árin.
„Sjálfbærni er mikilvæg fyrir Seachill og vinnur félagið eingöngu með MSC-vottuðum birgjum en til að öðlast slíka vottun þarf að sýna fram á vistvænar veiðar, styrkleika fiskistofna, ábyrga og sjálfbæra fiskveiðistjórnun,“ segir í tilkynningu.
„Seachill er einnig stoltur eigandi af The Saucy Fish Co. sem hefur gjörbylt skynjun breskra neytenda á fiskafurðum og hefur ört vaxandi alþjóðlegt orðspor. The Saucy Fish Co. hefur fjórum sinnum hlotið viðurkenningu frá CoolBrand í Bretlandi en viðurkenningin er veitt þeim sem þykja skara framúr á sínu sviði. „
Tekjur Seachill árið 2016 námu um 266 milljónum punda eða því sem nemur 37,5 milljörðum króna og EBITDA var um 10,4 milljónir punda eða 1,5 milljarður króna. Starfsmenn félagsins eru um 750 talsins.
Íslandsbanka og Oghma Partners hefur verið falin umsjón með söluferlinu.