Greiðum einna hæsta tekjuskattinn

Hérlendis er tekjuskattur einstaklinga með því hæsta meðal OECD-ríkjanna. Þegar horft er til skattbyrði launafólks er Ísland í þriðja til fjórtánda sæti af 35 aðildarríkjum Efnahags- og framfarastofnunarinnar (OECD) en það fer eftir því hvaða fjölskyldugerð og hversu há laun eru valin til samanburðar. Miðað við hin Norðurlöndin mælist Ísland yfirleitt inni í miðjum hópi þeirra.

Þetta kemur fram í ritinu Taxing Wages sem OECD gaf nýverið út en það inniheldur niðurstöður samræmdrar könnunar á skatt­lagn­ingu launa fram til ársins 2016. Fjármála- og efnahagsráðuneytið greinir frá þessu. 

Tryggingagjöld eru hins vegar ekki lögð á launafólk hérlendis og teljast þau lág á Íslandi miðað við OECD-meðaltalið sem var 14,4% í fyrra. Tryggingargjald laungreiðenda hér á landi er 6,85% árið 2017.

Ekki tekið tillit til óbeinna skatta

Útreikningar OECD taka tillit til fjölskylduhaga og endurgreiðslna í formi barnabóta. Þá er litið til svokallaðs skattafleygs en það er mælikvarði á skattbyrði á laun. Hann má skilgreina sem mismuninn á heildar­kostn­aði launagreiðandans við laun og launa­tengd gjöld til hins opinbera annars vegar og út­borg­aðra launa launafólks eftir skatt hins vegar.

Fleygur­inn táknar því þann hluta af heildar­launakostnaðinum sem opinberir aðilar taka til sín. Trygginga­gjald er meðtalið en ekki iðgjöld í líf­eyris­sjóði þar sem þau eru ekki greidd til opin­berra aðila og eru erfiðari í samanburði milli ríkja.

Í Taxing Wages er því fjallað um skatta á laun, með áherslu á að setja fram dæmi um fjöl­skyldu­gerðir sem unnt er að bera saman á milli landa. Hins vegar er hvorki fjallað um aðra beina skatta á heimili og fyrirtæki né óbeina skatta í Taxing Wages.

mbl.is/Kristinn Ingvarsson

Skattbyrði fjölskyldu hækkaði lítillega

Í ritinu eru sýnd tvö dæmi um skattafleyg á Norðurlöndum 2016. Annars vegar fyrir einhleypan, barn­lausan einstakling og hins vegar fyrir sam­búðar­fólk með tvö börn þar sem annað er úti­vinnandi. Launin eru í báðum tilvikum meðal­laun.

Á Íslandi hækkaði fleygurinn í tilviki fjöl­skyld­unnar en lækkaði í tilviki ein­hleyp­ings. Fleygurinn er í báðum tilvikum áfram lægri á Íslandi en á hinum Norðurlöndunum.

Skattafleygur fjölskyldunnar hækkaði um 0,73% milli áranna 2015 og 2016 en fleygur einstaklingsins lækkaði um 0,21%. 

Þetta þýðir að skattbyrði fjölskyldunnar hækkaði lítillega milli ára en skattbyrði einstaklingsins lækkaði lítillega.

• Blogga um frétt