Primera Air hefur samið um kaup og leigu á tuttugu nýjustu þotum Boeing og er flugfélagið fyrsti viðskiptavinur flugvélaframleiðandans fyrir þessar vélar. Þær nefnast 737-Max 9 ER (extended range) og hafa lengri flugdrægi en áður hefur þekkst fyrir þessa tegund véla. Samningurinn er gerður á milli Primera Air, Boeing Corporation og Air Lease Corporation. Tilkynnt verður um hann í höfuðstöðvum Boeing í Seattle í dag.
Á síðustu tólf mánuðum hefur Primera unnið með Boeing varðandi lokahönnun og útfærslu vélarinnar. Kaupin hafa verið fjármögnuð og gengið hefur verið frá leigusamningum.
Í tilkynningu segir að um sé að ræða einhverja mestu byltingu í flugrekstri síðustu tuttugu ára og mun þetta vera ein hagkvæmasta vél í rekstri sem framleidd hefur verið. Samkvæmt útreikningum Boeing er beinn rekstrarkostnaður á hvert sæti 40% lægri en á Boeing 757 vélum fyrirtækisins svo dæmi sé tekið.
Vélarnar verða með nýjum hreyflum frá CFM International, LEAP-1B, og með 20% betri eldsneytisnýtingu en núverandi Boeing 737-800 vélar semPrimera er með í rekstri í dag. Þá eru þær lengri og með hærri vigtir en núverandi 737 vélar og Max 8 vélarnar. VélarPrimera verða með 189 sæti, þar af 16 sæti á viðskiptafarrými.
Vélin getur flogið frá helstu borgum Evrópu til Bandaríkjanna, sem og frá Íslandi til vesturstrandar Bandaríkjanna, Flórida og Karíbahafsins og verður vélin lykillinn að vexti Primera Air á næstu árum.
„Kaup Primera Air á 737 Max 9 ER staðfestir sannarlega trú Primera á miklum möguleikum sem nú opnast meðal annars yfir Atlantshafið,“ er haft eftir Monty Oliver, framkvæmdastjóra alþjóðasölu hjá Boeing, í tilkynningu.
Primera segir að nýju vélarnar muni veita félaginu samkeppnisforskot á markaðnum.
Primera Air rekur í dag níu Boeing vélar, og flýgur til yfir 70 flugvalla í Evrópu. Félagið er með starfsemi í Danmörku, Svíþjóð, Finnlandi, Englandi og Íslandi en starfstöðvar þess eru í Danmörku og Lettlandi.
Primera Air velti um 24 milljörðum á árinu 2016 og skilaði 800 milljón króna hagnaði. Tilkynnt verður um nýja áfangastaði Primera Air á næstunni.