Neytendur og söluaðilar geta sparað færslugjöld og færsluhirðingu þegar Reiknistofa bankanna, RB, hleypir af stokkunum nýrri leið fyrir farsímagreiðslur hér á landi í haust. „Kostnaður við þessa nýju greiðsluleið er minni þar sem miðlun greiðslna verður einfaldari,“ segir Aðalgeir Þorgrímsson, framkvæmdastjóri Sérlausna hjá RB.
Hann segir í samtali við ViðskiptaMoggann að greiðsluleiðin gæti haft umtalsverð áhrif á greiðslumarkaðinn á Íslandi og skipt neytendur miklu máli. „Okkar áætlanir miða að því að þessi greiðsluleið verði jafnmikið notuð og aðrar greiðsluleiðir hér á landi eftir um það bil 3-5 ár.“
Nýja lausnin er frábrugðin öðrum lausnum að því leyti að greiðslur fara beint af innlánsreikningi greiðanda yfir á innlánsreikning móttakanda í stað þess að nota kredit- eða debetkortakerfin. Aðalgeir segir að lausnin auki öryggi greiðslna.
Bætt við klukkan 7:10
RB, Reiknistofa bankanna, hefur skrifað undir samstarfssamning við danska félagið Swipp, um innleiðingu á nýrri lausn fyrir farsímagreiðslur hér á landi. Þetta kemur fram í fréttatilkynningu.
„ Um er að ræða lausn sem gerir einstaklingum kleift að nýta farsímann til að greiða í verslun, millifæra og innheimta greiðslur. Hún er frábrugðin öðrum lausnum að því leyti að greiðslur fara beint af innlánareikningi greiðanda yfir á innlánareikning móttakanda í stað þess að nota kredit- eða debetkortakerfin. Swipp er í eigu 72 danskra banka og segir samstarfsamningurinn jafnframt til um það að þær viðbætur sem RB byggir við kerfið hérlendis geti einnig nýst á öðrum mörkuðum.
RB vinnur að innleiðingu lausnarinnar hér á landi og hefur hún ýmsa kosti umfram hefðbundin kortaviðskipti líkt og aukið öryggi greiðslna en önnur tæknihögun útilokar nær öll sviksemistilvik sem þekkt eru í kortaviðskiptum í dag. Jafnframt berast greiðslur verslunum strax við kaup á vörum og þjónustu. Í hefðbundnum kortaviðskiptum getur endanlegt uppgjör átt sér stað nokkrum dögum síðar. Ennfremur er kostnaður við þessa nýju greiðsluleið lægri þar sem að miðlun greiðslna verður einfaldari,“ segir ennfremur í fréttatilkynningu.