Hlutabréf Icelandair Group hafa hækkað um 5,1% í Kauphöllinni það sem af er degi. Félagið greindi frá flutningstölum sínum fyrir síðasta mánuð í gær. Gengi bréfa félagsins stendur nú í 15,25 krónum.
Félagið flutti um 488 þúsund farþega í júní og voru þeir 11% fleiri en í sama mánuði á síðasta ári. Sætanýting jókst þá á sama tíma frá 83,7% í 85,4%, þrátt fyrir að framboð sæta hafi einnig verið aukið um 11%.
Þá jókst fjöldi seldra gistinátta á hótelum félagsins um 5% samanborið við júní í fyrra. Herbergjanýting hafi hins vegar minnkað, hafi nú verið 80,0% miðað við 84,5% á síðasta ári.
Gengi félagsins í Kauphöllinni hefur ekki enn náð sér á skrið síðan bréf félagsins féllu töluvert í verði í febrúar í kjölfar afkomuviðvörunar. Þá fóru bréfin úr 22,1 krónu í 16,8 krónur á sólarhring.