Stærstu hótelkeðjur landsins upplifa það æ oftar að fólk bóki síður gistingu með stuttum fyrirvara og að hópar afbóki gistingu sem leiðir af sér minni herbergisnýtingu. Erlendum hótelgestum fækkaði á höfuðborgarsvæðinu í maí og samkvæmt uppgjöri Icelandair Group fyrir júní lækkaði herbergisnýting á hótelum fyrirtækisins úr 84,5% niður í 80%.
Þetta kemur fram í frétt Túrista.
Þar er vitnað í svar Davíðs Torfa Ólafssonar, framkvæmdastjóra Íslandshótela, við fyrirspurn Túrista þar sem segir að keðjan upplifi fyrrnefnd atriði en hótelkeðjurnar tvær, Íslandshótel og Icelandair Hotels, hafa samtals á að skipa hátt í 3.500 hótelherbergjum út um allt land.
Í frétt Túrista er bent á að gistináttatölur Hagstofu Íslands fyrir júní liggi ekki fyrir fyrr en í lok þessa mánaðar en samkvæmt tölunum fyrir maí fækkaði gistinóttum útlendinga á höfuðborgarsvæðinu lítillega í þeim mánuði. Það var í fyrsta skipti síðan í september 2013 að samdráttur varð í fjölda erlendra hótelgesta í Reykjavík og nágrenni. Á Vesturlandi og Vestfjörðum fækkaði hins vegar gistinóttunum um nærri tíund í maí síðastliðnum en aftur á móti fjölgaði útlendu gestunum á Suðurnesjum um meira en helming eins og sjá má töflunni fyrir neðan.