Flugfélagið Air India býður nú aðeins upp á grænmetisrétti á almennu farrými í ferðum félagsins innan Indlands. Ákvörðunin hefur verið gagnrýnd en flugfélagið segir þetta gert í ljósi sparnaðar. Ríkisflugfélagið er skuldum hlaðið og hafa indversk stjórnvöld íhugað að einkavæða það.
Gagnrýnendur grænmetisfæðisins líta svo á að með því sé verið að mismuna fólki og hafi lítil áhrif á rekstarkostnað félagsins. Forstjóri Air India hefur þó komið ákvörðuninni til varnar og sagst ekki skilja hvert vandamálið sé.
Mataræði getur verið mjög pólítiskt í Indlandi samkvæmt frétt BBC þar sem margir hindúar eru grænmetisætur en múslimar borða oft kjöt. Í dag mun hæstiréttur á Indlandi til dæmis skoða ákvörðun yfirvalda um að banna sölu á kálfakjöti vegna trúarlegra ástæðna.
Indverski kokkurinn Madhu Menon gagnrýndi ákvörðun Air India á Twitter og sagði pólitík augljóslega hafa haft áhrif. „Næst mun áhöfnin bara tala hindí. Síðan hlustum við á þjóðsönginn fyrir flugtak,“ skrifaði Menon.
Stjórnarformaður og framkvæmdastjóri Air India, Ashwani Lohani, varði ákvörðunina á Facebook og sagði hana „draga úr úrgangi, spara kostnað, bæta þjónustu og takmarka hættuna á því að réttum sé ruglað saman.“
Air India skuldar um átta milljarða Bandaríkjadala eða því sem nemur tæpum 840 milljörðum íslenskra króna.