Ísland er í öðru sæti á lista gagnagrunnsins Global Property Guide, sem skoðar húsnæðisverð í heiminum fyrstu þrjá mánuði ársins. Hong Kong er í fyrsta sætinu en kínverska borgin Shanghai í því þriðja.
Buisness Insider greinir frá listanum og nítján efstu löndum hans. Þar kemur fram að á Íslandi og á Írlandi hafi mátt sjá mestu hækkunina á húsnæðisverði í Evrópu, samhliða sterkum hagvexti. Húsnæðisverðið á Íslandi hækkaði um 16,01% milli ára fyrstu þrjá mánuði ársins samkvæmt úttekt Global Property Guide.
Í Hong Kong nam hækkunin 17,27% en hækkunin milli ársfjórðunga nam 3,93%. Í Shanghaí nam hækkunin 13,16%.
Í fjórða sæti listans má finna Kanada en þar hækkaði verðið um 11,7% og 8,91% á Írlandi sem er í fimmta sætinu. Svartfjallaland er í því sjötta með 8,68% hækkun og Rúmenía því sjöunda með 7,61% hækkun. Frændur okkar í Noregi eru í áttunda sæti með 7,38% hækkun.