Sterkt gengi dragi úr fjárfestingu í iðnaði

Hagfræðingur Samtaka iðnaðarins segir vísbendingar um að styrking krónu muni hafa áhrif á samsetningu iðnaðar í landinu. Færri störf í hátækniiðnaði sem er í erlendri samkeppni.

Tilefnið eru þær upplýsingar frá Hagstofu Íslands að prentgreinin hafi dregist verulega saman á síðustu árum. Minna er flutt inn af pappír og prentun hefur farið úr landi.

Í umfjöllun um mál þetta í ViðskiptaMogganum í dag segir Ingólfur Bender, hagfræðingur Samtaka iðnaðarins, að vegna sterkara gengis haldi sum iðnfyrirtæki að sér höndum. „Þegar gengið sveiflast mikið fælir það iðnfyrirtæki, einkum þau sem eru í mestri samkeppni við erlend, frá því að fjárfesta á Íslandi. Það er einfaldlega mun meiri óvissa í kringum fjárfestingu en ella,“ segir Ingólfur.