Sérstakur gististaður opnaður á Akureyri

Hafnarstræti Hostel hóf nýverið starfsemi í Amaro-húsinu við Hafnarstræti á Akureyri. Það er sérstakt að því leyti að þar sofa gestir ekki í hefðbundnum rúmum eða kojum, heldur eru þar svonefnd svefnhylki þar sem gestir geta lokað að sér.

Hafnarstræti Hostel er stærsta gistiheimili á Íslandi sem býður gistingu í svefnhylkjum. Þegar er starfræktur slíkur gististaður í Reykjavík, Galaxy Pod Hostel á Laugavegi. Einnig eru nokkur svefnhylki í Gistihúsinu Hamri í Vestmannaeyjum. Hið nýja hostel er þannig fyrsti gististaðurinn af þessari gerð á Norðurlandi.

Í umfjöllun um gististað þennan í Morgunblaðinu í dag segir Sandra Harðardóttir, eigandi hostelsins, að sérstaða þess felist í því að þar sé ögn meira næði fyrir gesti. Að öðru leyti sé þar öll hefðbundin þjónusta farfuglaheimilis, innifalinn morgunverður, sameiginlegur matsalur, baðherbergi og eldhús.