Travis Kalanick, fyrrverandi framkvæmdastjóri Uber, hefur verið lögsóttur af einum stærsta hluthafa fyrirtækisins fyrir svik. Kalanick, sem var látinn hætta sem framkvæmdastjóri í júní hefur verið lögsóttur af félaginu Benchmark Capital sem á 13% hlut í Uber en hann hefur verið sakaður um að reyna að koma bandamönnum sínum inn í stjórn fyrirtækisins. Talsmaður Kalanick hefur þó sagt ásakanirnar byggja á engu.
Lögmenn Benchmark halda því fram að Kalanick hafi sóst eftir því að festa sig í sessi í stjórn Uber og auka vald sitt í fyrirtækinu. Þá segir í kærunni að markmið Kalanick hafi verið að fylla stjórn Uber með „hliðhollum bandamönnum“ og að það væri tilraun hans til þess að einangra fyrri hegðun sína og gera það auðveldara fyrir hann að komast aftur í stöðu framkvæmdastjóra.
Kalanick var harðlega gagnrýndur í stöðu framkvæmdastjóra, ekki síst fyrir að hafa sest í viðskiptaráð Donalds Trump Bandaríkjaforseta.
Þá fóru fimm af helstu hluthöfum Uber fram á að hann léti af störfum sem hann gerði síðan í lok júní.
Undir stjórn Kalanick jukust árstekjur fyrirtækisins upp í meira en 7 milljarða dala. En hann leiddi fyrirtækið líka í vandræði, svo sem með notkun „Greyball“-hugbúnaðarins sem Uber notaði til að villa um fyrir stjórnvöldum, eða þegar fyrirtækið komst yfir sjúkraskýrslur konu í Indlandi sem sakaði ökumann Uber um nauðgun.
Önnur skýrsla sem Uber lét gera skoðaði 215 ásakanir um áreitni og einelti innan fyrirtækisins, og leiddi til þess að í síðustu viku voru 20 starfsmenn Uber reknir. Hafa þessi vandamál haldið yfirstjórn Uber mjög upptekinni og hefur þynnst í röðum stjórnendanna á sama tíma.