Icelandair hefur dregið til baka 50 uppsagnir en í júní sagði flugfélagið upp 115 flugmönnum. Upplýsingafulltrúi Icelandair segir að rekja megi ástæðuna til góðrar verkefnastöðu félagsins.
„Þetta má fyrst og fremst rekja til aukinna erlendra leiguverkefna sem félagið hefur unnið að á undanförnum mánuðum í samvinnu við systurfélagið Loftleiðir Icelandic, meðal annars á Grænhöfðaeyjum,“ segir Guðjón Arngrímsson upplýsingafulltrúi.
Frétt mbl.is: Loftleiðir semja á Grænhöfðaeyjum
Í síðustu viku var grein frá því að Loftleiðir Icelandic, TACV Cabo Verde Airlines og ríkisstjórn Grænhöfðaeyja í Vestur-Afríku hefðu gert samkomulag um samstarf við endurskipulagningu flugfélagsins TACV Cabo Verde Airlines.
Markmið samkomulagsins er enn fremur að styrkja alþjóðaflugvöllinn á Grænhöfðaeyjum og vinna að því að gera eyjaklasann að álitlegum ferðamannastað allt árið um kring.
„Það þýðir að i vetur verða alls um 430 flugmenn starfandi hjá Icelandair, töluvert fleiri en nokkurn tíma áður yfir vetrarmánuðina og að allir þeir flugmenn sem voru ráðnir til félagsins fyrir árið 2017 verða við störf í vetur.“