Eldey og Íslenskir fjallaleiðsögumenn hafa undirritað kaupsamning um kaup á meirihluta hlutafjár í Arcanum ferðaþjónustu en meðal hluthafa í Eldey eru fimm lífeyrissjóðir.
Í tilkynningu um kaupin segir að seljendurnir Benedikt Bragason og Tómas Birgir Magnússon hefðu stofnað félagið árið 2003 og að þeir verði hluthafar í félaginu að viðskiptunum loknum. Kaupsamningurinn sé gerður með fyrirvara um samþykki Samkeppniseftirlitsins og kaupverðið sé trúnaðarmál.
Starfsemi Arcanum og tengdra félaga ná meðal annars til jöklagangna á Sólheimajökli, vélsleðaferða á Mýrdalsjökli, fjórhjólaferða á Sólheimasandi og rekstur kaffihúss á staðnum. Auk þess ná kaupin til landsins Ytri-Sólheima 1A, allrar aðstöðu sem Arcanum er með að Ytri-Sólheimum og meirihluta í óskiptu landi Ytri-Sólheimatorfu.
Landeigendur Ytri-Sólheima hafa þegar stofnað með sér félag sem mun sjá um rekstur og uppbyggingu sameignarlandsins og þjónustu við ferðamenn og ferðaþjónustuaðila.
Eldey TLH hf. er fjárfestingafélag sem fjárfestir í afþreyingartengdri ferðaþjónustu. Hluthafar Eldeyjar eru fimm lífeyrissjóðir, Íslandsbanki og fleiri fjárfestar. Eldey hefur nú þegar fjárfest í þremur félögum, Norðursiglingu hf. á Húsavík, Gufu ehf. á Laugarvatni og Íslenskum fjallaleiðsögumönnum.
Íslenskir fjallaleiðsögumenn ehf. var stofnað 1994 en það býður upp á skipulagðar dagsferðir, lengri ferðir um landið og gönguferðir erlendis.