Gray Line hækkar ekki verð vegna útboðs

Stjórnarformaður Gray Line gerir ekki ráð fyrir að miðaverð í flugrútu fyrirtækisins muni hækka vegna útboðs á sætaferðum frá Keflavíkurflugvelli sem Isavia stóð fyrir. 

Í gær birti Túristi.is viðtal við Kristján Daníelsson, framkvæmdastjóra Kynnisferða, sem rekur m.a. Flugrútuna, sem sagði óumflýjanlegt að miðasverðið í hana myndi hækka vegna útboðsins.

Frétt af mbl.is

Miðaverð hækkar óumflýjanlega

„Við gerum ekki ráð fyrir að að miðaverð muni hækka. Við ætlum að færa okkur á ytra bílastæðið og halda sömu þjónustu og áður,“ segir Þórir Garðarsson, stjórnarformaður Gray Line í samtali við mbl.is.

Í nýafstöðnu útboði á aðstöðu fyrir sætaferðir frá Keflavíkurflugvelli buðust forsvarsmenn Kynnisferð til að greiða Isavia 41,2% af veltu Flugrútunnar fyrir áframhaldandi veru í og við flugstöðina. Samkvæmt frétt Túrista jafngildir það rúmum þúsund krónum af hverjum seldum miða sé miðað við núverandi verðskrá Flugrútunnar.

Þórir bendir á að Gray Line sé ekki að fara að greiða þá upphæð til Isavia eins og Kynnisferðir og býst því ekki við að verðin muni hækkað. 

Frétt af mbl.is

Bara tækifæri í töpuðu útboði

Ein ferð með flugrútu bæði Kynnisferða og Gray Line kostar 2.500 krónur, það er ef ferðin er á milli flugvallarins og rútustöðvar, en í tilfelli Gray Line er það rútumiðstöð fyrirtækisins við Holtagarða. Gray Line hóf að bjóða upp á ferðir til og frá Keflavíkurflugvelli árið 2011 en fyrir það höfðu Kynnisferðir verið með einkaleyfi á ferðunum um áratugaskeið.

Þórir Garðarsson, stjórnarformaður Gray Line.

Að sögn Þóris hækkaði verðið í 2.500 krónur úr 1.900 krónum með komu virðisaukaskatts á starfsemina í fyrra en fyrir það hafði verðið lítið hækkað frá árinu 2011.

„Samkeppnin hefur haldið aftur af verðhækkunum undanfarin ár en í fyrra kom virðisaukaskatturinn þarna inn og þá hafa verið miklar launahækkanir og hækkanir á afgreiðslugjöldum hjá Isavia.“

• Blogga um frétt