Þó dregið hafi úr launahækkunartakti hafa launahækkanir hér á landi verið mun meiri en í þeim löndum sem við eigum í mestum viðskiptum við. Styrking krónunnar hefur enn fremur orðið til þess að samkeppnisstöðu íslenskra fyrirtækja gagnvart erlendum hefur rýrnað.
Þetta kemur fram í Hagsjá hagfræðideildar Landsbankans.
Þar segir að launavísitalan hafi verið nær óbreytt milli júní og júlí og hafi alls hækkað um 7,2% frá júlí 2016. Hægt hafi nær sífellt á hækkunartaktinum frá aprílmánuði í fyrra, þegar árshækkunin náði hámarki í 13,4%. Vegna lítillar verðbólgu haldi kaupmáttur launa áfram að aukast og hafi verið meiri en nokkru sinni nú í júlí, eða 5,3% meiri en fyrir ári síðan.
Enn fremur segir að íslenska launavísitalan, mæld í evrum, hafi hækkað um 60% frá 2012 til 2016. Á sama tíma hafi laun í helstu viðskiptalöndum okkar hækkað að hámarki um 6-8%, verið nær óbreytt í Svíþjóð og lækkað um rúm 10% í Noregi. Raungengi krónu miðað við laun hafi alls hækkað um 66,5% yfir tímabilið 2012 fram á fyrsta ársfjórðung þessa árs.
„Fyrirtæki sem eru í útflutningi, hvort sem það er útflutningur á vöru eða þjónustu, búa því augljóslega við skerta samkeppnisstöðu og mega vart við miklum launahækkunum á næstu misserum ef samkeppnisstaða þeirra á ekki að versna enn meira.
[...] Eins og oft gerist í viðræðum um kjarasamninga hér á landi virðist ekki horft mikið til samkeppnisstöðu og samanburðar við viðskiptalönd okkar. Kröfur nú byggja mestmegnis á samanburði við aðra hópa og þar hafa ákvarðanir kjararáðs um verulegar launahækkanir til alþingismanna og stjórnenda innan ríkisins ekki gert stöðuna einfaldari.“