Davíð Lúðvíksson, forstöðumaður nýsköpunar hjá Samtökum iðnaðarins, segir „höggið á leiðinni“ í hugverkaiðnaði. Vegna sterks gengis og aukins innlends kostnaðar sé Ísland ekki lengur jafn samkeppnishæft.
„Við erum í svipaðri stöðu og 2006 þegar samkeppnisstaðan var mjög erfið. Þá var eitt ár í stóra hrunið.“ Davíð telur að næsta ár muni áhrifin af versnandi samkeppnisstöðu birtast í afkomu fyrirtækja. Hætta sé á að störf flytjist úr landi vegna hás innlends kostnaðar.
Áhrif gengisstyrkingar birtast líka í landbúnaði. Þar eru vísbendingar um að vegna aukinnar samkeppni við innfluttar matvörur verði fjölgun starfa hægari en ella. Erna Bjarnadóttir, aðstoðarframkvæmdastjóri Bændasamtaka Íslands, segir stöðu innlends landbúnaðar gagnvart innflutningi hafa versnað. Innlendur kostnaður sé hár og kjarasamningar fram undan.