Ebitda-hagnaður níu af stærstu útgerðum landsins dróst saman á milli ára í öllum tilvikum nema einu, samkvæmt samantekt ViðskiptaMoggans.
Lækkunin er á milli 6 og 41% eða um 15% að meðaltali hjá fyrirtækjunum níu. Lækkunin er svipuð og sem nemur styrkingu krónu á liðnu ári en hún nam 16%.
„Það kristallast í ársreikningum stærstu sjávarútvegsfyrirtækjanna að afkoman í atvinnugreininni fer versnandi, einkum vegna styrkingar gengis krónu,“ segir Jens Garðar Helgason, formaður Samtaka fyrirtækja í sjávarútvegi.
Stefán Friðriksson, framkvæmdastjóri Ísfélags Vestmannaeyja, segir í umfjöllun um mál þetta í blaðinu í dag að það hafi ekki farið að halla undan fæti í rekstrinum fyrr en á seinni hluta síðasta árs. Arðsemi eiginfjár hjá útgerðunum var meðaltali 16% hjá sjö fyrirtækjum af níu sem úttektin nær til.