Telja áhættu stafa af neytendalánum

Englandsbanki hefur varað við því að breskir bankar geti tapað allt að 30 milljörðum punda, sem jafngilda 4.387 milljörðum íslenskra króna, vegna vanskila á neytendalánum. 

Breski fréttamiðillinn The Telegraph greinir frá tilkynningu Englandsbanka þar sem fram kemur að breskir bankar geti lent í kröggum vegna vaxandi neytendalána í Bretlandi, sem nú nema samtals 200 milljörðum punda, fari hagkerfið í niðursveiflu. 

Telur bankinn að lánveitendur þurfi að skoða undirliggjandi gæði neytendalána en ekki einungis byggja mat sitt á vanskilahlutfallinu eins og það er í dag. Þannig geti lánveitendur vanmetið áhættuna sem stafi af niðursveiflu í hagkerfinu. 

Í kjölfar tilkynningarinnar lækkuðu hlutabréfaverð stærstu banka Bretlands en Lloyds Banking Group og Barclays höfðu lækkað um meira en 1% fyrir hádegi í dag. 

• Blogga um frétt