Orka náttúrunnar er tilnefnd til alþjóðlegu CHARGE-vörumerkjaverðlaunanna sem besta vörumerkið í flokki grænnar orku. ON er eina íslenska fyrirtækið sem tilnefnt er í flokknum og keppir þar við fjögur erlend vörumerki.
Besta vörumerkið að mati fjölmennrar alþjóðlegrar dómnefndar verður útnefnt 10. október næstkomandi.
Orka náttúrunnar tók til starfa í ársbyrjun 2014 eftir lögbundna aðgreiningu sérleyfis- og samkeppnisþátta í rekstri Orkuveitu Reykjavíkur. ON rekur þrjár virkjanir, selur rafmagn til um helmings landsmanna og aflar um helmings heita vatnsins í hitaveituna á höfuðborgarsvæðinu.
Þá hefur fyrirtækið staðið í uppbyggingu innviða fyrir rafbíla. Hleðslustöðvarnar eru orðnar 17 talsins og verða líklega orðnar fleiri en 20 fyrir árslok, að því er kemur fram í tilkynningu frá fyrirtækinu.