Air Berlin hefur greitt skuldir sínar við Isavia og er flugfélaginu nú frjáls að sækja Airbus 320-farþegaþotuna sem hefur verið kyrrsett á Keflavíkurflugvelli í tæpar tvær vikur.
Farþegaþota Air Berlin var kyrrsett á Keflavíkurflugvelli 20. október vegna vangoldinna gjalda. Félagið sótti um greiðslustöðvun í ágúst og vinnur nú að því að selja hluta starfseminnar til annarra flugfélaga.
Fyrst var greint frá málinu á Víkurfréttum en í fréttinni segir að öflugir snjóplógar hafi verið settir framan og aftan við vélina. Nú hafa þeir verið fjarlægðir.