Meiri einkaneysla á mann en árið 2007

Einkaneysla á mann verður tæplega prósentu meiri en árið 2007 á næsta ári. Útlit er fyrir að í ár, og næstu ár, muni einkaneyslan vaxa umfram kaupmáttaraukningu sem þýðir að draga muni úr sparnaði. 

Þetta kom fram í kynningu greiningardeildar Arion banka í vikunni á hagspá fyrir árin 2017-2020. Einkaneysla vex um 8,2% í ár og 5,3% á næsta ári samkvæmt spánni. 

„Við höfum séð að þetta ár er fyrsta árið í einhvern tíma þar sem kaupmáttur launa vex minna en einkaneyslan, sem þýðir að þetta er í raun fyrsta árið þar sem heimilin eru ekki að spara,“ segir Erna Björg Sverrisdóttir, sérfræðingur í greiningardeild Arion banka.

„Vöxtur einkaneyslu í ár er meiri en árið 2007 en þrátt fyrir það er hún í heildina minni á hvern einstakling. Á næsta ári tekur einkaneysla á hvern einstakling hins vegar fram úr því sem var árið 2007 og verður tæplega prósentu meiri.“

Úr hagspá Arion banka.

Erna Björg segir að þessi aukna neysla endurspeglist í sterkum innflutningstölum en hún setur fyrirvara þar sem þættir úr ferðaþjónustunni geti slæðst inn í útreikninginn. Hún telur ekki tilefni til að hafa áhyggjur af vexti einkaneyslu án þess að setja hann í samhengi við aðrar hagstærðir. 

„Það þarf að setja þetta í samhengi við aðrar stærðir og það er enn ekki tilefni til að hafa áhyggjur vegna þess að einkaneyslan er ekki drifin áfram af skuldsetningu,“ segir Erna Björg.

• 1 blogg um fréttina

Bloggað um fréttina

• Geir Ágústsson: Kæru Íslendingar, ekki safna skuldum!