Verðhækkanir í matvöruverslunum hafa í sumum tilvikum numið tugum prósenta og eru þær mjög breytilegar milli verslana. Á tveimur mánuðum hefur smjör hækkað um 40% í verði í Samkaupum og bananar um 106% í Víði.
Ferðaþjónustusíðan Must See In Iceland framkvæmdi verðkönnun á nokkrum matvörum 24. ágúst og 10. nóvember. Þar má lesa nánar um úttektina en vörurnar sem um ræðir eru smjör, mjólk, skyr, Oreo-kex, bananar, Pepsi-dós, pylsur, Knorr-súpa, brauð, Þristar og Cheerios-morgunkorn.
Eins og áður kemur fram hækkuðu 400 g af smjöri um 40% í verði í Samkaupum, eða úr 501 krónu upp í 757 krónur. Þar var verðið á smjöri hæst en lægst var það í Víði þar sem það kostaði 338 krónur.
Í Víði hækkaði kílóverð á banönum töluvert. Það hækkaði úr 189 krónum í 389 krónur, eða um 106%. Ódýrustu bananarnir fundust í Kosti þar sem kílóverðið er 209 krónur.
Flestar verðhækkanir voru í Nettó sem hækkaði verð sex matvara á listanum en fæstar voru í Samkaupum og Fjarðarkaupum sem hækkuðu aðeins verð einnar matvöru hvort.