Einbýlishús í Östermalmhverfinu í Stokkhólmi var nýverið selt á 125 milljónir sænskra króna sem jafngildir 1.539 milljónum íslenskra króna. Er þetta hæsta verð sem fengist hefur fyrir íbúðarhús í Svíþjóð.
Húsið er á þremur hæðum og er það ein ríkasta manneskja Svíþjóðar sem keypti húsið, Katarina Martinson. Hún er 36 ára gömul og situr í stjórnum fjölmargra fyrritækja, þar á meðal fjármála- og ráðgjafarfyrirtækja. Hún er náin vinkona Madeleine prinsessu og er dóttir sænska kaupsýslumannsins Fredriks Lundbergs.
Árið 2016 var Lundberg í 13. sæti listans yfir auðugustu Svíana en eignir hans voru þá metnar á 34 milljarða sænskra króna, 419 milljarða íslenskra króna. Katarina Martinson og systir hennar, Louise Lindh, starfa náið með föður sínum.
Martinson keypti húsið af útgáfufyrirtækinu Aller Media. Samkvæmt frétt Expressen hagnast útgáfan mjög á sölunni en húsið var keypt á 3,75 milljónir sænskra króna árið 1996.
Þar sem húsið hefur verið nýtt sem skrifstofuhúsnæði í 21 ár þarfnast það mikilla endurbóta áður en Martinson getur flutt inn.
Kauptilboð Martinson í húsið var það hæsta sem um getur í Svíþjóð en stjórnarformaður BP og Volvo, Carl-Henric Svanberg, keypti fyrr á árinu hús á 120 milljónir sænskra króna. Það hús er skammt frá húsi Martinson en endurbætur á því húsi kostuðu 15 milljónir sænskra króna. Líkur eru leiddar að því að endurbætur á þessu húsi muni kosta tvöfalda þá fjárhæð.