800 milljónir gætu misst vinnuna

Fram til ársins 2030 gætu allt að 800 milljónir á heimsvísu misst vinnu sína til vélmenna og vélvæðingar. Það jafngildir meira en fimmtungi af vinnuafli heimsins í dag.

Þetta kemur fram í frétt Bloomberg um nýja skýrslu McKinsey & Co sem náði yfir 46 lönd og 800 starfsheiti. Í skýrslunni segir að vélmennavæðingin hafi áhrif á bæði iðnríkin og þróunarríkin. Þá eru vélvirkjar, afgreiðslufólk og skrifstofustarfsmenn meðal þeirra starfstétta sem verða fyrir mestum áhrifum.

Jafnvel þó að vélmennavæðingin yrði ekki jafn hröð og gert er ráð fyrir er áætlað að um 400 milljónir missi vinnuna á næstu 13 árum. Hins vegar eru góðu fréttirnar þær að ný störf skapast í staðinn, til dæmis í öldrunarhjúkrun, tækni og garðyrkju.

„Við þurfum að breytast og læra að gera nýja hluti með tímanum,“ segir Michael Chui hjá McKinsey við fréttastofu Bloomberg. 

• 1 blogg um fréttina

Bloggað um fréttina

• Ómar Ragnarsson: Hvað gerir Trump nú?