Samgönguráðuneytið skoðar hvort nauðsynlegt sé að áætlun liggi fyrir, komi til erfiðleika hjá íslensku millilandaflugfélögunum sem stefna myndu starfsemi þeirra í hættu.
Þetta kemur fram í svari ráðuneytisins við fyrirspurn Túrista. „Þetta verkefni er á byrjunarstigi og því ekki unnt að segja nánar á þessu stigi hvaða tillögur gætu verið settar fram,” segir í svari ráðuneytisins og er tekið fram að málið sé unnið í samráði við fleiri ráðuneyti og að kallað hafi verið eftir upplýsingum frá Samgöngustofu.
Á ferðaþjónusturáðstefnu Landsbankans í september var kynnt greining hagfræðideildar bankans þar sem fram kom að ekkert annað þróað ríki reiddi sig í jafnmiklum mæli á tekjur af farþegaflutningum og Ísland.
Var þeirri spurningu velt upp hvort flugfélögin væru orðin kerfislega mikilvæg fyrirtæki fyrir efnahagslegan stöðugleika í svipuðum skilningi og stóru viðskiptabankarnir þrír eru fyrir fjármálastöðugleika.