Verulega að hægjast á hagvexti

Hagvöxtur á Íslandi á þriðja ársfjórðungi er sá minnsti sem mælst hefur í tvö ár. Þetta kemur fram í nýrri Hagsjá Landsbankans. Vísbendingar eru um að verulega sé farið að hægja á hagvexti hér á landi. 

Hagvöxtur mældist þannig 3,1% á þriðja ársfjórðungi á þessu ári borið saman við sama fjórðung árið áður. Tekið er fram að um bráðabirgðatölur Hagstofunnar sé að ræða. Hagvöxtur á öðrum ársfjórðungi var 3,4% og 7,4% á síðasta ári í heild.

Rifjað er upp að í spá hagfræðideildar Landsbankans frá því í nóvember hafi verið gert ráð fyrir að hagvöxtur yrði 5,5% á þessu ári.

„Hagvöxtur á fyrstu þremur fjórðungum ársins nemur 4,3% og er hann því minni en við spáum að verði yfir árið í heild. Hér er þó rétt að benda á að þetta eru bráðabirgðatölur auk þess sem tölur fyrir fjórða ársfjórðung munu hafa sín áhrif á vöxtinn.“

• 1 blogg um fréttina

Bloggað um fréttina

• Páll Vilhjálmsson: Hægari hagvöxtur veit á stöðugleika