„Á komandi árum verður heilbrigður hagvöxtur og við ætlum við að nýta þau til þess að lækka áfram skuldabyrði ríkissjóðs og styrkja innviðina,“ segir Bjarni Benediktsson, fjármála- og efnahagsráðherra, sem kynnti í morgun fjárlagafrumvarp fyrir næsta ár. 

Bjarni segir að áherslur í stjórnarsáttmála nýrrar ríkisstjórnar endurspeglist skýrt í frumvarpinu. 

„Við erum að setja stóraukna fjármuni inn í heilbrigðiskerfið þar sem við styrkjum bæði Landspítalann og sjúkrastofnanir þvert yfir landið. Aukningin fer í tækjakaup en líka inn í rekstur og uppbyggingu. Framlög til háskólastigs og framhaldsskólastigs verða aukin og  sömuleiðis verður ráðist í viðbótarframkvæmdir í vegakerfinu.“

Frétt af mbl.is

Aukin framlög til heilbrigðismála

Fjárlagafrumvarpið sem Benedikt Jóhannesson, forveri Bjarna, kynnti í haust gerði ráð fyrir afgangi á næsta ári upp á 44 milljarða en í nýju frumvarpi lækkar sú tala í 35 milljarða. 

„Skýringin er sú að við munum eyða auknum fjármunum í þessi mál sem ég nefndi. Ef við horfum á fjárlagafrumvarpið frá því í haust þá var ekki tekið tillit til ýmissa veikleika á útgjaldahliðinni. Þar sem ný ríkisstjórn eykur við útgjöld með sérstökum ákvörðunum dregur fyrir þær sakir úr afkomunni en hún er engu að síður góð.“

Á kynningu frumvarpsins í morgun tilkynnti Bjarni að í upphafi þings yrði lögð fram ný fjármálastefna til næstu fimm ára sem ekki yrði tekin til endurskoðunar nema forsendur breyttust verulega.

Spurður um velferðarmál í frumvarpinu nefnir Bjarni fjármögnun á aðgerðaáætlun í kynferðisbrotamálum sem dæmi. 

„Við setjum inn aukna fjármuni vegna áætlunarinnar sem kynnt var af dómsmálaráðherra til þess að styðja betur við ýmsa þætti í réttarvörslukerfinu. Sömuleiðis verða settir meiri fjármunir í heilbrigðiskerfið vegna þess.“

Tengdar fréttir

Fjárlög 2018

Umræðu um fjárlög lauk á miðnætti

• Framlögin aukin um 450 milljónir
• Ríkisstjórnin leiði verðlagshækkanir
• „Gefur lítið tilefni til bjartsýni“
• Fjárlagavinnan gengur vel

» Fleiri tengdar fréttir

• Blogga um frétt