Gjaldþrotaskipti á þrotabúi Sportfitness voru tekin upp að nýju eftir að lóð kom í leitirnar. Þrotabú Sportfitness var tekið til gjaldþrotaskipta árið 2014 og lauk skiptum sama ár. Niðurstaðan var sú að engar eignir fundust upp í kröfur sem námu 663 milljónum.
Í Lögbirtingarblaðinu er greint frá því að málið hafi verið tekið upp að nýju eftir að eign kom í ljós. Fékkst tæp ein og hálf milljón upp í kröfurnar. Samkvæmt upplýsingum frá skiptastjóra búsins komu peningar inn í búið þegar félaginu, sem Sportfitness átti 1,6% hlut í, var slitið og lóð, sem var aðaleign þess, var seld.
Sportfitness var meðeigandi útrásarfélags Björns Leifssonar, Þreks Holding. Sportfitness gekkst í ábyrgð fyrir láni sem var veitt fyrir kaupum á líkamsrækt í Danmörku. Eigandi þess sagði gjaldþrotið vera hefndarráðstöfun hjá Birni.