Breski vogunarsjóðurinn Lansdowne Partnes hefur næstum tvöfaldað hlut sinn í Fjarskiptum, móðurfélagi Vodafone, frá því í október og á nú 11,16% í félaginu.
Samkvæmt tilkynningu sem ber að senda út þegar eignarhlutur í skráðu hlutafélagi fer yfir 10% þröskuldinn á Lansdowne 33.094 hluti eftir viðskiptin sem áttu sér stað í gær. Markaðsvirði Fjarskipta í Kauphöllinni stendur í tæpum 19,1 milljarði króna og nemur því hlutur Lansdowne 2,1 milljarði.
Gögn um stærstu hluthafa skráðra hlutafélaga í Kauphöllinni frá því í janúar sýna að Lansdowne eigi rúm 8% í N1, 5,1% í Tryggingamiðstöðinni, 6,9% í Vátryggingafélagi Íslands og 2,9% í Símanum. Þá var hlutur Lansdowne í Fjarskiptum skráður 9,4%.
Greint var frá því í október síðastliðnum að Lansdowne hefði keypt 6,05% hlut í Fjarskiptum og hefur vogunarsjóðurinn því næstum tvöfaldað hlut sinn síðan þá.