Framleiða eigin skjái í leynilegri verksmiðju

Tæknirisinn Apple hefur verið að framleiða sína eigin skjái í fyrsta sinn í leynilegri verksmiðju nálægt höfuðstöðvum fyrirtækisins í Kaliforníu. Um er að ræða framleiðslu á fáum eintökum af nýstárlegum skjáum í tilraunaskyni. 

Þetta kemur fram í frétt á vef Bloomberg sem byggir á frásögn heimildarmanna sem þekkja vel til. Apple er að fjárfesta verulega í þróun MicroLED-skjáa samkvæmt heimildum Bloomberg. MicroLED eru ólíkir skjágerðinni OLED, sem nú viðgengst í farsímum, að því leyti að þeir eru bjartari, þynnri og ekki jafn orkufrekir.

Framleiðsan á MicroLED er hins vegar mun flóknari og var Apple næstum því búið að leggja verkefnið niður á síðasta ári. Síðan þá hafa verulegar framfarir átt sér stað en neytendur gætu þó þurft að bíða í nokkur ár eftir því að nýjungin komi á markað. 

Verð hlutabréfa í skjáframleiðendum í Asíu lækkuðu í verði eftir að fréttir af leynilegum áformum Apple voru birtar.

• Blogga um frétt