21st Century Fox hefur lagt til að sjónvarpsfréttastöðin Sky News verði seld til Disney til þess að tryggja það að yfirtakan á evrópska sjónvarpsrisanum Sky gangi í gegn.
Disney gekk í desember frá kaupum á stórum hluta af 21st Century Fox fyrir 52,4 milljarða Bandaríkjadala. Murdoch-fjölskyldan var helsti hluthafinn í Fox og fékk greitt fyrir hlutinn í hlutabréfum í Disney.
Fox hefur lengi sóst eftir því að kaupa þann 61% eignarhlut sem það á ekki í Sky en samkeppnisyfirvöld í Bretlandi úrskurðuðu fyrr á árinu að yfirtakan væri ekki til hagsbóta fyrir almenning og að áhrif Murdoch-fjölskyldunnar í fjölmiðlum yrðu of mikil.
„Samkvæmt þessum tillögum myndi Sky News starfa algjörlega sjálfstætt og vera tryggð fjármögnun frá Fox í 15 ár,“ segir í tilkynningu frá Fox sem telur að fyrirkomulag þetta taki tillit til þeirra athugasemda sem samkeppnisyfirvöld höfðu gert.
Sky rekur samnefnda fréttastöð, kvikmyndarás, sýnir beint frá ensku knattspyrnunni og veitir einnig net- og símaþjónustu.