Stjórnvöld í Kína segjast tilbúin að fara í viðskiptastríð við Bandaríkin „hvað sem það kosti“. Donald Trump Bandaríkjaforseti segist nú íhuga að setja enn meiri tolla á kínverskar vörur en hann hafði þegar boðað.
„Ef Bandaríkjamenn hundsa andstöðu frá Kína og alþjóðasamfélaginu og heldur því til streitu að setja á einhliða verndartolla mun Kína taka málið alla leið, hvað sem það kostar,“ sagði í yfirlýsingu viðskiptaráðuneytis Kína. „Við viljum ekki viðskiptastríð en við erum ekki hrædd við að taka þátt í slíku.“
Trump hafði þegar sagt að hann myndi setja tolla á kínverskar vörur úr áli og stáli. Kínverjar svöruðu fyrir sig með því að kynna fyrirætlanir um tolla á ferska ávexti, svínakjöt og endurunnið ál.
Trump sagði í ræðu í gær að í ljósi óréttlátrar hefndar Kínverja hafi hann beðið embættismenn um að íhuga að setja tolla á kínverskar vörur að verðmæti 100 milljarða dala til viðbótar við þá 50 milljarða sem hann hafði þegar tilkynnt um.