Hlutfall fasteigna á Íslandi sem eru í eigu leigufélaga og annarra lögaðila hefur tvöfaldast á síðustu 20 árum og er aukningin enn meiri miðsvæðis í Reykjavík.
Þetta kemur fram í skýrslunni Fjármálastöðugleiki sem var gefin út af Seðlabankanum og kynnt í morgun.
Í skýrslunni segir að leigufélög og aðrir lögaðilar hafi aukið hlutdeild sína í eignarhaldi á íbúðarhúsnæði á síðustu áratugum, einna helst miðsvæðis í Reykjavík. Árið 1996 áttu lögaðilar um 10% íbúðarhúsnæðis á landinu en árið 2017 hafði það hlutfall næstum tvöfaldast og miðsvæðis í Reykjavík jókst hlutdeild lögaðila enn meira á tímabilinu.
„Á sama tímabili sjást merki um að lögaðilar hafi almennt keypt eignir af meiri gæðum en einstaklingar, einna helst á því svæði. Ekki sjást því skýr merki um meiri áhættutöku hjá lögaðilum en einstaklingum, að því er þetta varðar,“ segir í skýrslunni.
Skuldir leigufélaga við innlenda viðskiptabanka með veði í íbúðarhúsnæði námu 12 milljörðum í árslok 2017 og drógust lítillega saman á milli ára. Heildarskuldir slíkra félaga jukust hins vegar talsvert á árinu 2017 en samkvæmt ársreikningum þriggja stærstu félaganna á þessum markaði námu skuldir þeirra nálægt 80 milljörðum króna.