Landsvirkjun hagnaðist um 900 milljónir króna á fyrsta fjórðungi þessa árs samanborið við 5,2 milljarða á sama tímabili á síðasta ári.
Rekstrartekjur námu 13,8 milljörðum króna og hækka um 18,8% frá síðasta ári. EBITDA nam 10,3 milljörðum króna og EBITDA-hlutfallið var 74,6% af tekjum. Hagnaður fyrir óinnleysta fjármagnsliði nam 5,5 milljörðum króna og hækkaði um 27,7% á milli tímabila.
Nettóskuldir lækkuðu um 400 milljónir króna frá áramótum og voru í lok mars 199,7 milljarðar króna. Handbært fé frá rekstri nam 8 milljörðum króna sem er 22,4% hækkun frá sama tímabili á síðasta ári.
Í tilkynningu um uppgjörið er haft eftir Herði Arnarsyni forstjóra að fyrsti ársfjórðungurinn 2018 væri sá tekjuhæsti í sögu fyrirtækisins. Það skýrist meðal annars af aukinni orkusölu og hærra álverði.
„Í apríl mánuði fór Þeistareykjastöð í fullan 90 MW rekstur, unnið er að stækkun Búrfellsvirkjunar og er áætlað að gangsetning verði um mitt sumar 2018. Fjármunamyndun fyrirtækisins (handbært fé frá rekstri) á fyrsta fjórðungi ársins stóð að fullu undir þessum fjárfestingum og að auki lækkuðu nettó skuldir frá áramótum.“