Viðskipti | mbl | 31.5.2018 | 11:26

Málshöfðanir hrúgast inn

Ópíóíðalyf. OxyContin, OxyNorm Tamadol og fleiri. mbl.is/Valgarður Gíslason

Actavis er eitt þeirra lyfjafyrirtækja sem bandarísk sveitarfélög og borgir hafa höfðað mál gegn vegna ofskömmtunar á ópíóíðalyfjum. Má þar nefna New York borg auk smærri sveitarfélaga sem telja lyfjafyrirtækin bera ábyrgð á ótímabærum dauðsföllum og kostnaði vegna ópíóíða-faraldurins

Í kvörtun sem lögð var fram af hálfu St. Martin í Louisiana í síðustu viku sakar sveitarfélagið lyfjafyrirtækin um að hafa áratugum saman brotið lög alríkisins sem og ríkisins með sölu á verkjalyfjum þrátt fyrir að vita af hættunni á ávanabindingu þeirra. Lyfjafyrirtækin hafi orðið uppvís af því að birta falsaðar fréttatilkynningar varðandi hættuna og ávinning af notkun lyfjanna með því að markaðssetja ópíóíða sína beint til lækna og sjúklinga í Louisiana.

Frétt af mbl.is

Lyf sem bjargar mannslífum

Sveitarfélagið heldur því fram að lyfjafyrirtækin hafi greitt læknum fyrir að starfa sem ráðgjafar þeirra og að hafa fjármagnað samtök (front group) sem mæltu með notkun ópíóíða í meðferðarskyni.

Lyfjafyrirtækin hafi jafnvel fengið lækna og aðra til þess að skrifa upp á frekari notkun ópíóíða þrátt fyrir að viðkomandi sjúklingur bæri merki um að vera orðinn háður verkjalyfinu.

Farið er fram á að lyfjafyrirtækin greiði læknis- og meðferðarkostnað þeirra sem glíma við fíkn í lyfseðilsskyld lyf. Auk þess að farið er fram á að þau greiði kostnað tengdum því þegar börn fæðast með ópíóíðafíkn og fatlanir sem rekja má til notkunar á ópíóíðum á meðgöngu.

New York borg fer fram á að fá greiddan hálfan milljarð Bandaríkjadala frá fyrirtækjunum vegna kostnaðar sem borgin þarf að greiða vegna ópíóíðana. Má þar nefna að árið 2016 létust yfir eitt þúsund íbúar New York vegna ofskömmtunar á ópíóíðum. Fleiri létust árið 2017 úr ofskömmtun á ópíóíðum í borginni heldur en í umferðarslysum og morðum samanlagt.