Upplýsingagjöf lánafyrirtækja ófullnægjandi

Neytendastofa hefur tekið ákvarðanir gagnvart þremur fyrirtækjum, Aur, Pei og Greitt sem veita neytendalán, vegna skorts á upplýsingum við lánveitingu.

Frá þessu er greint í frétt á vef Neytendastofu, sem tekið hefur ákvörðun um að fyrirtækin skuli bæta úr upplýsingagjöf sinni innan fjögurra vikna.

Í lögum um neytendalán er lögð rík upplýsingaskylda á lánveitendur í auglýsingum, fyrir samningsgerð og við samningsgerð. Gert er ráð fyrir að upplýsingar sem veittar séu fyrir samningsgerð komi fram á sérstöku formi sem auðvelda neytendum að gera samanburð á lánum.

„Neytendastofa óskaði eftir upplýsingum frá lánveitendunum Aur, Pei og Greitt ásamt afriti af þeim gögnum sem neytendum eru veitt þegar þeir taka lán. Hjá öllum lánveitendum vantaði tilteknar upplýsingar annars vegar í svokallað staðlað eyðublað og hins vegar í lánssamning,“ að því er segir í fréttinni.

Ákvað stofnunin að fyrirtækin skuli bæta úr upplýsingagjöf sinni innan fjögurra vikna og hafa Aur og Pei þegar tilkynnt Neytendastofu að hafist sé handa við að gera viðunandi breytingar.

• Blogga um frétt