Dregur úr vöruskiptahalla

Vöruútflutningur frá Íslandi nam 287 milljörðum króna á fyrri hluta þessa árs, að því er fram kemur í Hagsjá Landsbankans. Til samanburðar nam vöruútflutningurinn 244 milljörðum króna fyrir sama tímabil í fyrra.  Aukningin nemur 43 milljörðum eða um 18%.

Innflutningur nam 370 milljörðum króna og jókst um 40 milljarða á þessu tímabili, eða um 12,1%. Afgangur á vöruskiptum gagnvart útlöndum það sem af er ári er því 83 milljarðar, sem er ívið lægri upphæð en á sama tíma í fyrra þegar vöruskiptahallinn mældist 86 milljarðar.

Vöruskiptahallinn er engu að síður töluvert mikill, að því er segir í Hagsjánni, sé hann settur í samhengi við þróun síðustu ára en þetta er næstmesti halli á vöruskiptum sem mælst hefur á þessari öld.

Það ber þó að hafa í huga að vöruskiptajöfnuður er einungis einn liður í greiðslujöfnuði við útlönd.

Á móti hallanum á vöruskiptajöfnuði kemur nefnilega nokkuð myndarlegur afgangur af bæði þjónustujöfnuði og fjármagnsjöfnuði.

• Blogga um frétt