Hlutabréf Tesla hrapa í verði

Hlutabréf í rafbílaframleiðandanum Tesla hröpuðu í dag við upphaf viðskipta í Bandaríkjunum. Í gær var tilkynnt um að Elon Musk, forstjóri og stofnandi félagsins, hefði verið kærður af fjármálaeftirliti Bandaríkjanna fyrir svik eftir að hann tilkynnti mjög óvænt í síðasta mánuði um að hann hefði ákveðið að taka fyrirtækið af markaði. Hætti hann við áformin nokkru síðar.

Frétt af mbl.is

Musk kærður fyrir svik

Um­mæl­in um­deildu birt­ust í færslu sem Musk birti á Twitter 7. ág­úst. Það kom mörg­um mjög á óvart þegar Musk birti færsl­una þar sem hann hefði „tryggt fjár­mögn­un“ af­skrán­ing­ar fyr­ir 420 dali á hlut. Það leiddi til þess að hluta­bréfa­verð hækkaði.

Hefur meðal annars verið bent á að 420 sé tala sem tengd er við kannabisneyslu, en fyrr í þessum mánuði reykti Musk kannabis í beinni útsendingu og vakti athæfið talsverða athygli.

CNBC segir í dag að Telsa hafi verið nálægt því að undirrita samkomulag vegna ummæla Musk. Fól það í sér að félagið myndi greiða sekt, en á móti væri ekki viðurkennd sekt félagsins eða Musk. Þó þyrfti Musk að hverfa frá sem stjórnarformaður félagsins í tvö ár. Musk gat ekki sætt sig við þetta og hætti við samkomulagið á síðustu stundu samkvæmt CNBC.

Eftir að greint var frá kærunni í gær lækkuðu bréf Tesla á eftirmarkaði og var lækkunin um 12% við opnun markaða í dag. Þegar þetta er skrifað hafa bréfin aðeins hækkað á ný, en lækkunin frá því í gær nemur samtals 11,11% frá lokunarverði í gær.

Elon Musk hefur verið duglegur við að koma sér í sviðsljósið undanfarið og oftar en ekki hefur það verið vegna umdeildra ummæla eða athafna. AFP

• Blogga um frétt